Бугарија отвора ново поглавје во воздухопловството

Бугарија, со својата богата историја во воздухопловството, денес пишува нова страница во оваа област. Ова го изјави Хесус Кабајеро, извршен директор на „СОФ Конект“, оператор на аеродромот во Софија, за време на отворањето на меѓународната воздухопловна конференција Aviation-Event 2024 SOF, која се одржа во Бугарија.

Конференцијата собра над 200 индустриски експерти и лидери, кои дискутираа за клучните трендови што го обликуваат авијацискиот сектор во регионот. Главни теми беа примената на вештачка интелигенција, дигитализацијата, одржливиот развој, проширувањето на капацитетите на аеродромите, инфраструктурниот напредок, привлекувањето таленти и стратешката позиција на Бугарија во рамките на Шенген зоната.

Партнерства и развој

На прес-конференцијата беше истакнато партнерството меѓу „СОФ Конект“ и SITA – една од водечките светски компании во областа на технолошки решенија за воздухопловството. Дополнително, беше презентирана и стратегијата за развој на аеродромот во Софија како клучен регионален центар за воздушен транспорт.

„Позицијата на аеродромот во Софија е од огромно значење“, изјави Кабајеро. „Секој нов авион што ќе слета овде отвора повеќе можности за патниците да стигнат до разни дестинации. Истовремено, се трудиме да ги одржиме ниските такси, што привлекува патници од цела Европа, вклучувајќи земји како Полска, Шпанија и други“, додаде тој.

Идни планови

Кабајеро нагласи дека е неопходно да се продолжи со подобрување на поврзаноста, не само со европските градови, туку и со дестинации од целиот свет. „Нашата цел е аеродромот да стане водечки регионален центар, овозможувајќи патување на подолги релации со минимален број трансфери“, истакна тој.

Исто така, се работи на реализација на планот за изградба на нов терминал – Терминал 3. Со неговото отворање, аеродромот во Софија се очекува да стане најголемиот на Балканот, со капацитет од околу 20 милиони патници годишно.